Num 23 | TVK | STEP | Di, Balam biteni mi Balak bit, “Upol ni hor te sanien eo inggak lihe lu e he sav (7). Ti uleh buluk lihe lu e he sav (7), e sipsip mun lihe lu e he sav (7) xa labe malohos.”

Numbers 23

1 Di, Balam biteni mi Balak bit, “Upol ni hor te sanien eo inggak lihe lu e he sav (7). Ti uleh buluk lihe lu e he sav (7), e sipsip mun lihe lu e he sav (7) xa labe malohos.”

2 Ma suv toto Balak pol ni nggoni ngan xa xi biteni. E xal Balam, lupol kekes ni sanien xil ni buluk e sipsip xil ak e hor te sanien xil vus. 3 Di, provet Balam biteni mi suv toto Balak bit, “Xouk usoh uta tak itel xat sanien eo nam xil ak. E inou, niha nipus pisi xa Iahova mei ihisu minou. Naha kestang xa xi ipisen ni minou, inou nitilomun mei nihiteni minuk.” Ma, mika sen tang e pungei be romulit vathu. 4 E rute ak, Hi mei bisu mini, e Balam biteni mini bitene, “Inou napol ni hor te sanien eo labe lu e he sav (7), e xil kekes, nadin buluk tei del sipsip tei en.”

5 Iahova misa sepinien xil mi Balam xa ha ihit mesen mi suv toto Balak. 6 Ma xi dilomun be visal Balak xa di tamu misoh sangas visal hor nan xil te sanien del eilep xil tahal Moab. 7 Balam bit kil rae xil na Hi xa biteni bit:

“Suv toto Balak tehur nou
ra vathu xil tahal Aram xa di rin xa be ist.
Xi mikes nou e biteni minou bit, 'Umei usepin e rin navan.
!Usa halesil mi mol-Isrel xil!'
8 ?E nisa halesil mi ngan xil xa Hi tenasa ti halesil mi xil itep?
Inou nasakras nisa pangasien mi ngan xil xa Iahova tenasa ti vari pangasien mi xil.
9 Melele xa natete nesao e vathu, nateketeh tehe tan e natepus xil.
Io, melele xa natete vathu inou natepus kil xil.
Xil labe tetit moletin tatei xil xa ladi nga tasexil,
e lasav ni kantri sav xil.
10 Vatimol xil xa lastal langgo Siekob labe holu pupu langgoni suhon. ^{▼▼23.10sepinien xati teni bevulmeas}
Reitin, mol-Isrel xil, lasakras lavuli xil.
Melele xa meulien navan ivus, ma ieok bei xa hoxalite teni ixoni moletin na Hi tova xil ak.
Ieok bei xa nimat itel tomat ixoni tova xil xa limese pe met Hi.”
11 Di, suv toto Balak biteni mi provet Balam bit, “?Naha iaxa opol ni minou xiak? Natehuruk otemei inggak tengan usa halesil vaha ni ngan xil xa labe elu del xat nou, e obiles sung, usa tuxolxatien mi xil.”

12 E Balam bit rilomun ni bit, “Inou nihit kes ni naha xa Iahova biteni minou tengan nihiteni.”

Suv toto Balak nggur provet Balam ludilomun lube vathu tei mun e Balam pol ni hor lu e he sav (7) mun e midin buluk tei e nani tei e hor xil vus tengan vasis Hi vamaen ni vasa halesil tova vaha ni mol-Isrel xil. E melele nen ak mun, Iahova maen xi tengan isa sepinien te tuxolxatien kestang iha mi xil. Ngan ak testal tehe valu.